Yá hai fecha y hora pa la reapertura del tráficu n’El Muro en direición Náutico

El Muro va recuperar el tráficu en doble sentíu esti martes a les 9 hores. Asina lo confirmó’l Conceyu pa cumplir cola sentencia xudicial a favor de Stop Muro que pon fin dos años depués al usu de la calzada más pegada a la sablera pa usu esclusivu de los peatones.

Foi na desescalada del 2020 cuando l’Ayuntamientu tomó la decisión de dexar un solu carril pal tráficu en direición al parque Isabel la Católica y reconducir pela carretera la Costa’l que diba en direición al centru. D’esta forma ampliábase l’espaciu pal paséu nun momentu complicáu pola incentidume provocada pola COVID-19 y la necesidá d’evitar aconceyamientos importantes de xente.

Más alantre llegaría la instalación de moblame y la pintura del cascayu pa facer más agradable esta execución provisional que, dende un primer momentu, tuvo la oposición d’un grupu de ciudadanos organizaos na plataforma Stop Muro, que xudicializaron l’asuntu. Una sentencia a favor provoca agora la reapertura del tráficu en sentíu El Náutico, obligando a una actuación que principió’l 20 de xunu y que fina mañana.

A les 9 hores los coches van tornar a l’avenida Rufo García Rendueles, con posibilidá namái de dar xiru a la izquierda en Menéndez Pelayo y en Capua. Pa los peatones queda, sicasí, el tramu de lo que yera’l vieyu carril bici.