‘Animatopeyes’: esposición y talleres pa la reciella

El XLV Día de les Lletres Asturianes, esto ye, el 3 de mayu, va abrir les sos puertes una esposición nueva entamada pola Oficina de Normalización Llingüística na sala 3 del Centru de Cultura Antiguu Institutu. Nesta ocasión va tar protagonizada por ‘Animatopeyes’, prestosu llibru pa prellectores de Rafa R. Valdés y Samuel Castro.

Editada por Trabe, esta obra, númberu 3 de la coleición ‘Pequena’, presenta animalinos de casa xugando coles onomatopeyes qu’ellos faen, dibuxos que s’acompañen de dos llinies de testu breve. “Busca ser un preséu pa families y profesoráu pa tresmitir la llingua asturiana a lo más piquiñino”, apunten dende’l SNL xixonés sobre’l títulu al que dedica la so espoción próxima, tomando’l relevu de ‘Asturianes’ (La Fabriquina) d’Alicia Álvarez.

Del 3 al 31 de mayu va poder visitase na sala 3 del Antiguu Institutu esta orixinal muestra pensada pa la reciella que va tar formada por llámines y material pa trabayar los distintos sentíos en rellación colos animales (muñecos de trapu, identificación de soníos…). Al igual que n’anteriores iniciatives, va completase con diferentes actividaes, nesta ocasión destinada pa neñes y neños de 4 a 7 años.

Asina va haber talleres de globoflexa los díes 6, 13 y 20, y de papiroflexa el 8, 15 y 22, sesiones de 45 minutos de baldre nel mesmu espaciu de la esposición con entamu previstu pa les 18.30 hores. Les places van ser llendaes, 10 por sesión, con inscripción abierta de baldre dende’l xueves viniente, 2 de mayu, a les 8.30 hores nesti enllaz.

Na imaxe, Rodríguez Valdés y Castro nuna firma del llibru nel puestu de Trabe na 'Semana Negra'. Semeya propiedá d'Ediciones Trabe.