La esposición ‘Animatopeyes’ permite trabayar los sentíos con diferentes materiales

Yá se pues visitar na sala 3 del Centru de Cultura Antiguu Institutu la esposición ‘Animatopeyes’, que tien orixe nel llibru homónimu pa prellectores de Rafa R. Valdés y Samuel Castro. Ésta ta teniendo una bona respuesta de reciella y families, como amuesa que se completaren toles places de los talleres complementarios con papeles y globos.

El vienres pasáu, Día de les Lletres Asturianes, abrió les sos puertes esta muestra compuesta por llámines y material pa trabayar los distintos sentíos en rellación colos animales, como muñecos de trapu. Prestoses representaciones d’animales qu’apaecen nel llibru editáu por Trabe y los sos soníos decoren una sala que va encantar a los pequeños de la casa.

La muestra va tar abierta al públicu hasta’l día 31 de llunes a sábadu de 17.30 a 20.30. De forma complementaria, entámense trés de talleres de globoflexa (queden por celebrar sesiones el llunes y el día 20) y de papiroflexa (el miércoles y el 22) de 45 minutos qu’escosaron yá toles places, con persones en reserva.

Semeya propiedá de la Oficina de Normalización Llingüística.