Moriyón resulta investida gracies a los votos de VOX, qu’entra nel gobiernu municipal de Foro y PP

Xixón va tener un gobiernu tripartitu de derecha los cuatro años próximos. Foro cedió nes negociaciones con VOX pa garantizar el votu que-y faltaba pa los 14 que conformen la mayoría absoluta a cambiu d’entregar Festexos y Divertia al partíu de Sara Álvarez Rouco, y Carmen Moriyón recuperó’l sábadu’l bastón de mandu.

D’esta forma, l’alcaldesa ente 2011 y 2019 sumó un total de 15 apoyos (8 de Foro, 5 del PP y 2 de VOX) polos 10 del candidatu socialista Luis Manuel Flórez ‘Floro’ (9 del PSOE y 1 de Podemos). Los 2 ediles de Convocatoria por Xixón (IX-Más País-IAS), partíu que’l vienres pidía a Foro y PSOE frenar a la ultraderecha, astuviéronse.

El pautu de Foro con VOX tien dos puntos no que respeuta a la ‘Política llingüística’. El primeru afita la “conxelación de les polítiques de promoción llingüística na so situación actual, ensin que puedan esistir incrementos de les partíes presupuestaries destinaes a les mesmes, direuta o indireutamente” y el segundu, que “toa promoción de ‘Gijón’ en territoriu nacional fadráse n’español y si ye internacional nel idioma del país destinatariu de la mesma”.

Mentes, nel so discursu d’investidura Moriyón presentó l’ideariu de Foro como “herederu de Xovellanos”, magar estes midíes sobre l’asturianu y la vuelta de los toros esti mesmu agostu, como prometiera en campaña, y rescampló la vocación del so partíu, “asturianista en defensa de la nuesa tierra, la so cultura milenaria y les sos señes d’identidá”.