“Va haber conxelamientu de partíes, pero non retrocesos nes polítiques de normalización”, afirma López Moro

El Conceyu va tener Plan de Normalización Llingüística nesta llexislatura que sustituya al actual, que comprende’l periodu 2020-2023. La conceyal de Foro que se va encargar de Cultura, Ana Montserrat López Moro, confirma esta cuestión y asegura que “va haber conxelamientu de partíes, pero non retrocesos nes polítiques de normalización”.

La que fora responsable d’esti área nel gobiernu anterior de Carmen Moriyón (2015-2019) y prometiera'l cargu d'edil n'asturianu'l sábadu ta estos díes trabayando pa preparar les llinies d’actuación pa los cuatro años vinientes. No que respeuta a la política llingüística, acudió a la Oficina de Normalización Llingüística a falar cola responsable “sobre’l llabor d’estos cuatro años últimos”, pero la so ausencia al tar disfrutando de les sos vacaciones va retrasar unes xornaes esti alcuentru y va centrase n’estudiar “la documentación de lo que se fixo nesti tiempu” que solicitó al equipu del SNL.

Magar que’l desaniciu de la Oficina yera ún de los oxetivos de VOX na negociación del pautu con Foro, “a lo que nos negamos”, l’alcuerdu ente los dos partíos en política llingüística quedó, según marca’l documentu fechu públicu, na “conxelamientu de les polítiques de promoción llingüística na so situación actual, ensin que puedan esistir incrementos de les partíes presupuestaries destinaes a les mesmes, direuta o indireutamente” y en que “toa promoción de ‘Gijón’ en territoriu nacional fadráse n’español y si ye internacional nel idioma del país destinatariu de la mesma”.

“Va haber conxelamientu de partíes, pero non retrocesos nes polítiques de normalización”, aseguró López Moro, que confirmó que “va facese un Plan de Normalización nuevu, yá que l’actual ta vixente hasta esti añu”, pa lo que va convocar al Conseyu Asesor de la Llingua, que tien qu’anovase cola llexislatura nueva como tou conseyu sectorial. Sobre’l presupuestu, afirmó que “ye suficiente” y apuntó que’l Conceyu de Xixón ye’l que más dedica a la normalización llingüística.

Un téunicu pa la direición de la Fundación Municipal de Cultura

Entrugada pola persona qu’ocupará la direición de la Fundación Municipa de Cultura, Educación y Universidá Popular en sustitución de Miguel Barrero, declaró que “nun ta decidío, pero nun va ser del partíu, sinón un perfil téunicu que pueda xestionar cuestiones pendientes tan importantes como Tabacalera, el Revillaxixéu, l’Albergue o los depósitos”.

Na imaxe, López Moro nel Plenu de payares xunto cola popular Ángela Pumariega, primer teniente d'alcalde depués del alcuerdu de gobiernu de Foro, PP y VOX que da l'Alcaldía a Carmen Moriyón.