Ésti ye’l repartu definitivu de conceyalíes y competencies del Conceyu ente Foro, PP y VOX

L’alcaldesa Carmen Moriyón yá oficializó’l repartu de competencies ente los diferentes ediles de Foro, PP y VOX, partíos que conformen l’equipu de gobiernu. El primeru, queda con siete conceyalíes y l'Alcaldía, los populares con cinco y la formación d’ultraderecha con ún.

Dende ayeri tolos responsables d’área pueden trabayar con normalidá una vegada formalizáu’l repartu de competencies. Moriyón resérvase Igualdá y la xestión de fondos europeos, mentes que los sos compañeros van llevar les conceyalíes d’Urbanismu (Jesús Martínez Salvador, que tamién va xestionar el Botánicu y presidir la EMA); Cultura (Ana Montserrat López Moro, que preside la Fundación Municipal de Cultura, Educación y Universidá Popular, y el Conseyu Asesor de la Llingua); Infraestructures Urbanes y Rurales (Gilberto Villora); Facienda (María Mitre); Tráficu, Movilidá y Tresporte Públicu (Pelayo Barcia, que va presidir EMTUSA); Seguridá Ciudadana y Emerxencies (Nuria Bravo); y Rellaciones Institucionales (Jorge González-Palacios).

La popular Ángela Pumariega ye la primer teniente d’alcalde, anque va tomar la figura hasta agora inesistente de vicealcaldesa, y va llevar Economía, Emplegu, Turismu y Innovación. Les otres conceyalíes del PP son Servicios Sociales, Vivienda y Educación (Ángeles Fernández-Ahúja); Deportes (Jorge Pañeda); Mediu Ambiente y Sostenibilidá (Rodrigo Pintuales, que va presidir EMULSA); y Participación, Atención a la Ciudadanía, Mercaos y Consumu, Distritos, Cooperación al Desarrollu y Inmigración (Guzmán Pendás).

Per parte de VOX, va encargase de Festexos la edil Sara Concepción Álvarez Rouco, mentes que’l so otru representante, Óliver Suárez Rubio, va presidir Divertia.