Floro gana les eleiciones, pero Moriyón podría algamar l’Alcaldía en casu de llegar a alcuerdos

Foro podría recuperar l’Alcaldía. La presencia de la ex primer edil Carmen Moriyón llevó al partíu asturianu a consiguir 8 conceyales, 5 más que na convocatoria del 2019, polos 9 del ganador de les eleiciones, el socialista Luis Manuel Flórez ‘Floro’, pero debería llegar a alcuerdos con otres formaciones pa garrar el bastón de mandu.

Col cien por cien del votu escrutáu, el PSOE algamó 40.602 votos (28,95 por cientu de los votos pol 34,20 de va cuatro años) polos 40.274 de Foro (28,72 por cientu por un 12,37), una victoria que pue ser insuficiente pol aumentu d’apoyu al bloque de la derecha. Los primeros pierden 3 ediles, mentes que los segundos ganen 5.

5 son los que tienen la tercer fuercia, el PP, con un 16,61 por cientu del total (11,22), un aumentu de 2, y 2 VOX, con un 7,99 por cientu (7), que caltién la mesma representación. Estos 7 ediles seríen fundamentales pa que Moriyón llevara l’Alcaldía, pero Foro siempre amosó’l so refugu de llegar a alcuerdos cola formación ultraderechista.

Mesmu porcentaxe que VOX rexistró Convocatoria por Xixón, la coalición d’Izquierda Xunida (IX), Más País y Izquierda Asturiana (IAS), en concreto 2 votos más: 11.211 por 11.209. Esti resultáu permite a IX-IAS pasar de 1 edil (6,20 por cientu) a 3.

Ciudadanos, de líder de la oposición a nun contar con representación

Podemos, con un 5,15 por cientu (11,89 xunto en coalición con EQUO), pierde dos conceyales, anque caltién la representación. El que sal del casa consistorial ye Ciudadanos, principal fuercia de la oposición nesta llexislatura, con 5 ediles, al pasar d’un 13,39 por cientu a un 0,95 por cientu de los votos a pesar de presentar el mesmu candidatu, José Carlos Fernández Sarasola.

EQUO, en coalición con Los Verdes, rexistró un 0,71 por cientu insuficiente. Mentes, Andecha Astur algamó un 0,25 por cientu al contar con 351 votos, un pequeñu aumentu con respeuto al 2019, cuando sumó 295 (0,22).

La participación foi del 64,09 por cientu, superior a va cuatro años, cuando foi del 60,56 por cientu. Hebo un 1,46 por cientu de votos en blancu (0,90’) y un 1,06 por cientu de votos nulos (0,64).

Na semeya, Monchu García, secretariu xeneral de l'Agrupación Socialista de Gijón/Xixón, y Floro ayeri depués de conocer los resultaos.