Doce partíos preséntense a les eleiciones conceyiles

El 28 de mayu celébrense eleiciones municipales en Xixón, con renovación de candidatos en tolos partíos con representación, a esceición de Ciudadanos, que repite con José Carlos Fernández Sarasola. En total son 12 les candidatures presentaes, dos más que na cita coles urnes del 2019 que ganó'l PSOE.

La eleición de Luis Manuel Flórez ‘Floro’ como candidatu a l’Alcaldía del PSOE llueu del movimientu de l’agrupación del partíu pa que nun repitiera l’alcaldesa Ana González Rodríguez y la vuelta de Carmen Moriyón, primer edil del 2011 al 2019, pa liderar la llista de Foro son los principales aiciones de los partíos de cara a esta cita. La primera fuercia de la oposición, Ciudadanos, apuesta otra vuelta por Sarasola, mentes que’l PP da l’alternativa a la conceyala Ángela Pumariega.

A la izquierda del PSOE, Izquierda Xunida (IX) y Izquierda Asturiana (IAS), que se presentaron va cuatro años con Asturies pela Izquierda, entrando nel equipu de gobiernu con Aurelio Martín como conceyal de Mediu Ambiente y Movilidá, axunten a Más País y preséntense como Convocatoria por Xixón –nel BOPA, pendiente de correición, apaez como ‘Convocatoria por (Gijón)’– con Javier Suárez Llana como candidatu, y Podemos y EQUO, que xuntos algamaron 3 conceyales, van separtaos. Olaya Suárez encabeza la llista morada y los ecoloxistes van como Verdes EQUO Gijón con Rufino Fernández Alonso como númberu.

Pela so parte, el séptimu partíu con representación, VOX, presenta a Sara Concepción Álvarez Rouco. Nesta llexislatura ocupó un escañu na Xunta Xeneral.

La candidatura de Pepín Braña

Debuten nesta cita eleutoral los partíos Que Hable Gijón, creáu alredor del conocíu José María Suárez Braña, ex presidente de la Federación de Peñas Sportinguistas, y de Suma Principado, qu’acude con Luis Antonio Junco. Completen el llistáu’l partíu nacionalista Andecha Astur, con Alexander Martínez Fernández, y el Partido Comunista de los Trabajadores de España (PCTE), con Gonzalo Fernández Cerezo.

Con respeuto al 2019, l’única formación que nun se presenta ye Por Gijón.