El Plenu aprueba’l Presupuestu cola astención de Podemos-EQUO

El PSOE, col apoyu de Xixón pela Izquierda (IX-IAS) y l’astención de Podemos-EQUO, sacó alantre’l Presupuestu municipal pal 2022, el más altu de la historia del conceyu. L’alcuerdu pa destinar 1,7 millones pal programa nomáu Xixón Social p’ayudar a families necesitaes, clave.

Foron llargues les negociaciones pa que les cuentes municipales pal 2021, marcaes nun primer momentu pola incertidume creada pola sentencia del Constitucional sobre la plusvalía, salieran alantre. La renta social de Podemos-EQUO finalmente se convirtió nel programa Xixón Social, que va tener dos llinies, consumu enerxéticu y gastos básicos como productos ópticos o tratamientos bucodentales, y que yera la mayor demanda d’un documentu con 46 puntos de la coalición de moraos y ecoloxistes.

El presupuestu, que tien una previsión d’ingresos de 247 millones d’euros y con un consolidáu asciende a 336, aprobóse’l miércoles col votu de calidá de l’alcaldesa en segunda vuelta al contar con 12 votos a favor y 12 en contra. Ciudadanos, Foro, PP, VOX y el conceyal non adscritu Alberto López-Asenjo opunxérose a les cuentes con crítiques al alcuerdu de la izquierda.