La oposición vota en bloque contra los presupuestos, que se prorroguen

El Plenu estraordinariu del Conceyu de Xixón refugó’l Presupuestu Xeneral del Conceyu pal 2023 presentaos pol equipu de gobiernu municipal. Tolos grupos de la oposición votaron en contra a les cuentes, polo qu’automáticamente se prorroguen les actuales nun añu eleutoral.

Éstes salieron alantre nel 2021 gracies a l’astención de Podemos-EQUO, que nesta ocasión decidióse pol ‘non’ depués de nun llegar a alcuerdos col PSOE. La coalición pidía un millón d’euros pa la renta social, otru pa la colocación de paneles solares en Roces y un terceru pa una partida pa dar salida los pidimientos de los Conseyos de Distritos, amás d’una llinia de 200.000 eueros pa la creación d’una llinia d’ayudes pa la rehabilitación de viviendes vacíes que xestionara depués la Empresa Pública de Vivienda.

Dende’l gobiernu municipal respondiérase que nun había perres disponibles polos compromisos nes inversiones con financiación europea y que la solución yera xubir un 8 por cientu l’impuestu sobre la recoyida de basura. Podemos-EQUO negóse dafechu a una midida asina y apuntó a la recaudación del IBI diferenciáu, ensin llegar a un consensu.

Asina, PSOE y Asturies pela Izquierda (PSOE-IX) quedaron el vienres solos sofitando unes cuentes qu’ascendíen a 369,4 millones d’euros y que queden nel caxón, prorrogándose los actuales, polo qu’habrá de facer usu de modificaciones presupuestaries. Ésta ye la segunda ocasión na que se da esti casu, ya que nel 2021 l’equipu de gobiernu decidió prorrogalos pola disminución de los ingresos corrientes y l’aumentu de los gastos pola COVID-19.

Na semeya, bancos del Salón de Plenos onde s'asitia la mayor parte de la oposición nel momentu de votar 'non' al Presupuestu Xeneral del Conceyu pal 2023.