La población del Xixón urbanu y de delles zones rurales, confinaes dos selmanes pola COVID-19

Una incidencia acumulada de 353 casos de COVID-19 cada 100.000 habitantes nos 14 díes últimos llevó al Gobiernu a establecer un confinamientu perimetral en Xixón. Les zones afeutaes son la urbana y zones rurales, anque l’alcaldesa Ana González insiste n’amplialu a tol conceyu al igual que se-y permitió'l sábadu a Avilés.

Dende’l sábadu y hasta’l 7 de payares los xixoneses –la inmensa mayoría de la población– que viven nuna zona acotada qu’inclúi la zona urbana y Xove, Tremañes, Roces, Somió, Cabueñes y una parte de Deva nun van poder salir de la mesma salvo motivos xustificaos, como acudir al centru de trabayu o d’estudios. Mentes, el restu de la población del conceyu y d’Asturies nun va poder entrar na ciudá.

La midida llega pola incidencia alta que ta teniendo’l coronavirus SARS-CoV-2 nel conceyu, la mayor del país, y tamién s’aplica a la zona urbana d’Uviéu (258) y a tol conceyu d’Avilés (329). L’alcaldesa, tres la negativa recibida’l sábadu, va insistir esta tarde nel Comité de Crisis de COVID xunto col presidente Adrián Barbón pa que’l confinamientu perimetral sía pal too territoriu de Xixón, como asocede nel casu d’Avilés, y non nes llendes actuales.

Na semeya, mapa difundíu pol Gobiernu a partir de Google Maps –que nun respeta la toponimia oficial– con una llinia collorada que marca la zona confinada.