Barbón encamienta a treslladar de manera formal la propuesta pa confinar tol conceyu

Ana González solicitó al Gobiernu nel Comité de Crisis de COVID tres l'estáu d'alarma que'l zarru nun quedara namái pa la zona urbana.

La intención de l'alcaldesa que coincide cola del primer edil d'Uviéu, Alfredo Canteli, ye que'l confinamientu perimetral en vigor dende'l sábadu, y que se caltién tamién tres la decisión del Executivu nacional de pesllar Asturies dende'l miércoles, fora pa tol conceyu, al igual que se decidió p'Avilés. Y asina treslladólu na xunta celebrada na tarde d'ayeri.

El presidente Adrián Barbón esplicó tres la mesma que la resolución espublizada nel BOPA'l vienres dictaba'l pieslle pa la zona urbana y que foi Delegación del Gobiernu estatal n'Asturies la que'l sábadu decidió les zones que s'incluyíen de cada conceyu. "Pidimos-yos que nos faigan una propuesta formal y habrá un aconceyamientu de trabayu en Delegación del Gobiernu coles Fuercies y Cuerpos de Seguridá del Estáu, y les policíes municipales pa esaminar si ye posible o non atender a esa demanda", esplicó'l socialista.

Na imaxe, un momentu previu a la celebración del Comité de Crisis de COVID, nel que González participó de manera telemática.