El zarru perimetral amplíase a tol conceyu

Siete díes depués del establecimientu del zarru perimetral de la zona urbana de Xixón, el deséu de l'alcaldesa d'amplialu a tol conceyu ye aprobáu pol Gobiernu. El BOPA espublizó na tarde del vienres un suplementu nel que modifica la resolución.

El presidente Adrián Barbón encamentara a Ana González Rodríguez nel Comité de Crisis de COVID telemáticu del llunes que treslladara'l pidimientu de manera formal, dalgo que la primer edil fixo nos díes siguientes. Finalmente'l Conseyu de Gobiernu d'ayeri dio'l preste a esti cambiu, que ta acabante d'entrar en vigor.

Hasta'l 7 de payares, día hasta la que va siguir el zarru perimetral de Xixón, sacante haya una prórroga del mesmu nel casu de que nun se consiga baxar la incidencia acumulada nos 14 díes previos de 548 casos cada 100.000 habitantes –la media nacional ye de 335–, los xixoneses van poder movese per tol conceyu, anque non salir del mesmu. Namái por causes xustificaes afitaes nel decretu, como motivos llaborales, d'estudios o médicos, ye posible trespasar les sos llendes hacia otros llugares del país.