Los bailles tradicionales tamién tienen presencia pa festexar San Pedro

Depués de celebrar San Xuan, Xixón preparáse pa festexar el llunes al so patrón, San Pedro. Dende’l vienres, y tola fin de selmana, tán programaes actuaciones de grupos de baille tradicional en dellos puntos de la villa p’animar esta fiesta llocal qu'esti añu va tar marcada pola crisis sanitaria, con bendición de les agües con aforu reducíu.

Tampoco nun va haber entrega de les medayes del conceyu pola pandemia de COVID-19, cola decisión d’aprovechar la xornada p’anunciar les persones y entidaes que les merecen nesta ocasión. La intención ye entamar l’actu d’entrega nel Teatru Xovellanos cuando se dean les condiciones afayadices.

Les primeres actuaciones por San Pedro van tener llugar mañana, a les 20 hores, nel parque de Les Palmeres en Contrueces y na sablera d’El Natahoyo, na cai Mariano Pola, a cargu de l’Asociación de Coros y Danzas Jovellanos y de Coros y Danzas Flor de Xaranzaina, de manera respeutiva. El sábadu, a la mesma hora, va ser el turnu del Grupo Folklórico El Xolgoriu, na plaza d’Italia, y del Grupo Folklórico Trebeyu, na plaza’l Marqués, mentes que’l domingu, al meudía, Música y Baile Tradicional Excelsior va danzar en La Pedrera.

El llunes, San Pedro y San Pablo, va caltenese la bendición de les agües en Campu Valdés, anque nesta ocasión con restricciones pa mantener les midíes de seguranza pola crisis sanitaria.

Esti añu nun se va poder repetir esta imaxe, correspondiente al 2017, de la bendición de les agües por San Pedro.