San Xuan va celebrase magar l’ausencia de foguera

|
Baille y enrame de San Pedro

La crisis sanitaria pola pandemia de COVID-19 nun va poder cola celebración el martes de San Xuan, que va adaptase a la situación actual, nin cola fiesta de San Pedro, patrón de la ciudá. El Conceyu, que nun entama foguera, programa enrames de fontes y baille tradicional, y edita un videu n’asturianu qu’esplica esta tradición.

La sablera d’El Natahoyo, que venía acoyendo nos años últimos la foguera, va quedar vacía nesta ocasión, con ausencia tamién de conciertu, como asocedió tamién l’añu pasáu. La imposibilidá de qu’haya grandes aconceyamientos de xente por cuenta l’andanciu obliga a tomar esta decisión.

Sí se caltién l’enrame de la fonte de Pelayo, qu’Andecha de Cultura Tradicional Na Señardá fai tolos años, qu’esti añu s’amplía a otres munches fontes del conceyu. Asina, a les 20 hores, les de la Laviada, Llantones, El Polígono, Begoña, Deva y Trubia, y otres asitiaes nes places del 17 d’agostu y de la Fábrica del Gas, y na cai Munuza, van engalanase de la mano de dellos grupos de baille.

Y ye que la tradición diz que San Xuan ye l’únicu momentu d’atopar la flor del agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

Éstos y otros munchos detalles sobre la historia y les tradiciones d’esta nueche máxica pues consultalo nesti reportaxe fechu pa ‘A la Gueta los Suaños’. Amás, Divertia asoleya un videu con versión n’asturianu que resume una investigación de la historiadora Begoña Torre sobre San Xuan.

Contador Estadistiques