El Gobiernu estatal robla’l conveniu del Plan de Víes

Xixón yá ve la lluz al final del túnel. La robla del conveniu del Plan de Víes por parte del Gobiernu estatal pon fin a años d’incertidume con respeuto al soterramientu de les llínees férrees hasta La Calzada, la puesta en marcha del metrotrén y la construcción d’una estación intermodal cercana al Muséu del Ferrocarril.

El Conseyu de Ministros d’esta mañana dio’l preste al alcuerdu ente Adif Alta Velocidad, Adif, Renfe Operadora, el Gobiernu d’Asturies, el Conceyu de Xixón y la Sociedá Xixón al Norte pa la integración del ferrocarril na ciudá. Ésti sustitúi al del 2002, baxo’l mandatu del Partido Popular (PP), y básase na solución que se ta cabilando nel estudiu informativu anguaño en redaición, qu’ubica la futura estación intermodal frente a onde taba l’antigua Estación del Norte.

La inversión estimada en las actuaciones previstas, que serán executaes ente 2019 y 2025, asciende a 814,02 millones de euros (IVA incluyíu), polo que la final va superar los 1.000 millones si contamos les perres invertíes hasta agora nel Plan de Víes. El convenio inclúi tamién la puesta en marcha del metrotrén desde’l Solarón hasta Viesques, asina como la so prolongación hasta l’Hospital de Cabueñes, con un costu de 313,66 millones de euros incluyíu nel total de la obra.

El 75 por cientu de la inversión correspuende al Estáu, mentes que’l país y el conceyu van poner 90 millones caún. D’esta forma dase solución a un problema que llevó a la movilización de les vecines y vecinos de Xixón mientres años, con manifestación y inclusive un zarru na Casa Conceyu.

Na semeya, l'asturiana María Luisa Carcedo, ministra de Sanidá, Consumu y Bienestar Social, atiende a los medios gráficos xunto cola vocera del Gobiernu estatal, Isabel Celaá, momentos enantes de la rueda de prensa tres el Conseyu de Ministros.