El Conceyu recibirá'l vienres el conveniu del Plan de Víes pa la so firma

L'alcaldesa Carmen Moriyón confirmó al restu de grupos parllamentarios nel penúltimu Plenu de la llexislatura que'l Conceyu recibirá'l conveniu del Plan de Víes el vienres pa la so firma. Va ser el pasu caberu enantes de la so execución tres la so robla pol conseyeru Fernando Lastra y del restu de partes del alcuerdu.

El pasáu 17 d'abril el Gobiernu estatal daba'l preste al conveniu que da lluz verde al soterramientu de les llínees férrees hasta La Calzada, la puesta en marcha del metrotrén y la construcción d’una estación intermodal cercana al Muséu del Ferrocarril. Darréu roblábenlu'l Gobiernu d'Asturies y el conseyu d'alministración de Xixón al Norte.

Tres la firma por parte Adif Alta Velocidad, Adif y Renfe Operadora, queda pendiente la robla del conseyeru d'Infraestructures, Ordenación del Territoriu y Medio Ambiente, Fernando Lastra, prevista pal xueves, y la del Conceyu de Xixón pa la so posterior espublización definitiva nel Boletín Oficial del Estáu (BOE). L'Ayuntamientu va poner 90 millones de los 814,02 destinaos pal desendolcu del Plan de Víes.

Na semeya, Moriyón –nel centru, de verde– nel conseyu d'alministración de Xixón al Norte que dio'l preste al conveniu del Plan de Víes sofitáu pol Gobiernu estatal.