'Paisajes para la escucha', de Juanjo Palacios

'Paisajes para la escucha' ye una instalación sonora plantegada dende la práutica artística que pretende alteriar el paisaxe sonoru del Patiu Corintiu de la Llaboral incorporando una serie de soníos prindaos nes Reserves de la Biosfera d'Asturies. Per aciu un sistema de soníu multifocal, constituyíu por un conxuntu d'altavoces estratéxicamente asitiaos, va crease un ambiente acusmáticu onde'l visitante va tener una esperiencia d'escucha distinta dependiendo del llugar del patiu nel que s'atope.

Esta instalación ye un exerciciu d'enmarcáu de soníos de redolaes naturales sacaos de contestu, col propósitu de xenerar un espaciu de reflexón dende'l campu del arte qu'apunte aspeutos de conciencia ecolóxica al visitante. Los soníos que conformen la instalación pertenecen a grabaciones orixinales realizaes nel Parque Nacional de Los Picos d'Europa y el Parque Natural de les Fontes del Narcea, Degaña y Ibias ente los años 2017 y 2019 pal proyeutu Reserva Sonora de la Biosfera d'Asturies.