Xixón "¡Ye mundial!"

El conceyu promociónase como destín turísiticu con una campaña na qu'emplega cuatro idiomes falaos na mariña cantábrica.

Con Rodrigo Cuevas como protagonista y un cantar de so como banda sonora, esti videu promocional de 20 segundu de llargor tien como oxetivu llegar a los ciudadanos de los territorios cercanos. La normalidá nueva va provocar un aumentu del turismu interior y de distancies curties y Xixón busca presentase como un destín afayadizu ente posibles visitantes del país y d'autonomíes vecines.

Asina, la campaña 'Xixón en toles ocasiones' emplega l'asturianu, el gallegu, l'eusquera y el castellanu nos testos en caúna de les cuatro versiones. Na mesma Cuevas presenta a Xixón como llugar de playa y naturaleza, de gastronomía, de cultura, d'historia y de vanguardia.