Xixón recupera por unanimidá la figura de cronista oficial depués de 31 años d'ausencia

L’historiador Luis Miguel Piñera ye’l nuevu cronista oficial de Xixón a propuesta de la Sociedá Cultural Xixonesa y del Atenéu Obreru de Xixón, y col apoyu finalmente de tolos grupos municipales. D’esta forma’l conceyu recupera esta figura ausente dende la muerte na seronda del 1992 de Patricio Aduriz a los 65 años d'edá.

L’ampliu apoyu de la sociedá civil terminó por camudar la so postura a Ciudadanos, Foro y PP, que s’astuvieron nuna primer votación el mes pasáu, al igual que Podemos, lo qu’impidió que saliera alantre esti nomamientu al necesitar dos tercios de la Corporación. Nel casu de la formación morada, l’asamblea llocal foi la que dio’l mandatu a la vocera Laura Tuero de modificar la posición.

Con unanimidá salió, poro, escoyíu Piñera na xunta de voceros de güei, anque entovía falta la so confirmación por parte del Plenu. Profesor d’institutu nacíu na villa nel 1951 y formáu como inxenieru téunicu y historiador, tien espublizaos más de 40 llibros y ye bien conocíu pola so faceta d’articulista en prensa.

Esti nomamientu permite cubrir el vaciu nel conceyu d’esta figura ensin remuneración 31 años depués. L’últimu cronista oficial de Xixón foi Aduriz, que contó con esi honor del 1982 al 1992.

Na semeya, Piñera. Imaxe (recortada) propiedá de la Sociedá Cultural Xixonesa.