El Plenu ratifica la concesión de la Medaya d’Oru de la Villa a la ‘Semana Negra’

|
Honores y Distinciones de la Villa de Xixón 2023

Les decisiones de la xunta de voceros sobre los Honores y Distinciones de la Villa d’esti 2023 y el nomamientu del cronista oficial nuevu ratificáronse por unanimidá en Plenu. La Medaya d’Oru va recibila pa San Pedro la ‘Semana Negra’, mentes que les de Plata son pal Club Balonmano La Calzada, 30 Días en Bici y Australian Blonde.

Nel añu que cumple 35 años de vida, la ‘Semana Negra’, el certame alredor de la lliteratura prieta creáu por Paco Ignacio Taibo II col sofitu del entós alcalde Vicente Álvarez Areces, recibe’l reconocimientu del conceyu. Dende esa primer edición del 1988 consolidóse “como ún de los eventos de referencia del calendariu xixonés y algamó un calquier que tresciende les llendes de la nuesa ciudá, espandiéndose per distintos llugares d’España, Europa y Llatinoamérica” gracies a la calidá de convidaos y a la so fórmula d’amestar cultura y folixa, atrayendo a miles de visitantes al recintu nel que s’instala.

Les medayes de plata van nesta ocasión pa un club deportivu, una iniciativa ciudadana y un grupu de música. En concreto va recibila nel actu que va tener llugar el 29 de xunu, día de San Pedro, el Club Balonmano La Calzada, campeón de Copa nel 2018 y cuartofinalista de la EHF European Cup esta temporada nel so debut europeú; 30 Días en Bici, campaña añal de promoción del usu de la bicicleta; y Australian Blonde, banda a la qu’encuadraron nel Xixón Sound que se fixo popular nos 90 gracies al so cantar ‘Chup chup’.

Amás, declaróse a Francisco Vizoso como Fíu Adoptivu de la Villa, médicu ciruxanu gallegu que dende va unos 30 años trabaya nel Hospital de Xove. “Al traviés de la FICEMU consiguió que Xixón sía un referente na investigación de célules madre”, espliquen dende l’Ayuntamientu.

Nesta sesión plenaria tamién se confirmó’l nomamientu de Luis Miguel Piñera como cronista oficial nuevu de Xixón. El conceyu nun contaba con esta figura dende’l 1992, cuando finó Patricio Aduriz.

Na semeya, distinguíos y representantes de la coleutivos reconocíos esti añu, nel salón de plenos.

Contador Estadistiques