Xixón diz sí a la música y la cultura n’asturianu

La práutica totalidá del Plenu voto a favor de la propuesta presentada por Podemos, PSOE y Convocatoria por Asturies “en defensa y promoción de la música y cultura n’asturianu en Gijón/Xixón, especialmente nos eventos festivos, educativos y culturales”. La única oposición foi la de VOX, quedando los sos dos ediles solos col ‘non’.

Xixón dixo esta mañana sí a la música y la cultura n’asturianu. Mapi Quintana encargóse de defender la propuesta, que venía sofitada pola plataforma que promovió’l manifiestu ‘Música n’asturianu sí’, que contó col sofitu de 4.200 firmes del sector, y la Sociedá Cultural Xixonesa; l’asociación Grana, N’Alcordanza de Yolanda Huergo; la Caja de Músicos; la Sociedad Cultural Gesto; y l’Atenéu Obreru de Xixón, ente los ediles nel primer Plenu ordinariu de la llexislatura y a la puerta de les fiestes de la villa.

“Al poco de formase la nueva conceyalía de Festexos hubo varioes declaraciones que provocaron indignación y preocupación en munchos sectores de dientro y fuera de la ciudá”, apuntó Quintana, “un ambiuente que, pensamos nun tendría d’interesar a naide. Tolo que tien que ver cola defensa de la cultura autóctona, de la industria cultural asturiana, de les nuestres señes d’identidá y de la llibertá d’espresión, ye dalgo que la sociedá en xeneral vive con gran normalidá y que tendría que tar fuera de debates partidistes interesaos. Por eso, queremos facer güei un llamáu al consensu, a mirar al futuru y a los puntos d’alcuentru”.

La música aseguró que “tamos mui convencíos de que la mayoría de xixoneses nun va ver conciertos de ‘plataformas de apoyo a la cooficialidad de la llingua’, sinón propuestes artístiques que s’espresen nun idioma, el que seya, con normalidá”. Y los artistes “podrán dicir o non dalgo a favor de la oficialidá o d’otros temes d’actualidá; ye la so decisión y tienen derechu a facelo, como ampara la Constitución. Qué paradoxa sería que-yos contraten en Madrid, Beirut, Sidney o Buenos Aires, pero equí non porque decidimos facer esta ciudá más pequeña en cuantes a derechos y cultura”.

Por eso “nós queremos un Xixón grande d’alma, onde tienen sitiu los qu’unos llamen ‘artistas asturianos de siempre’ y a los que nós preferimos nun poner etiquetes escluyentes”. Recordó llueu que la música del país “espresóse n’asturianu dende va sieglos, non como un inventu modernu”, poniendo l’exempu de que con ‘Soi de Verdiciu’ “tamos cantando na mesma llingua qu’usó Marcos del Torniello en 1904 pa escribier el poema que-y da lletra a est cantar”.

Reivindicó que “Xixón tien les blimes pa ser un motor de la cultura n’asturianu, en toles sos formes. Pero pa ello hai que creer no que tenemos y pensar sobre’l modelu de promoción cultural que queremos, poniendo l’exemplu de Granada col flamencu, Lisboa col fadu o L’Habana cola salsa, o fenómenos como Tanxugueiras pa Galicia cola so propuesta pa competir n’Eurovisión. “La cultura asturiana tien el mesmu potencia qu’estos exemplos. Nun somos menos que naide, polo que sobra’l ponenos trmapes a nós mesmos y ye fundamental trabayar por qu’haiga un mayor conocimientu de les nuestres señes d’identidá per parte la sociedá”.

Pa finar llamó a los grupos a sofitar la moción, “que ye coherente cola mayoría de les sos programes eleutorales”, pa arrancar la llexislatura “con consensu, garantizando derechos fundamentales y faciendo por que medre la incidencia social de la cultura n’asturianu y por que se desarrol más una industria cultural que, según les cifres de la EPA en 2022, n’Asturies da trabayu a 11.000 persones”. Una declaración “necesaria, qu’ayuda a protexer, conservar, valorar y tresmitir ente les xeneraciones venideres esta ayalga que tenemos que ye’l nuestru patrimoniu cultural”.

L’alderique

Olaya Suárez Fernández, conceyala de Podemos, foi la primera n’intervenir nel alderique previu a la votación. “Ye surrealista que teamos debatiendo sobre un vetu n’Asturies a cultura n’asturianu”, apuntó pa depués señalar que “la oficialidá ye una demanda que va contra naide” y recordar que les llingües nun son un problema pa la ciudadanía, poniendo l’exemplu de Rodrigo Cuevas o de la esitosa actuación de Zoo nel Tsunami “cantando en valencianu”.

Quedó sola defendiendo la so postura Sara Concepcion Álvarez Rouco, conceyala de VOX responsable de Festexos, que se refirió a la propuesta como “respetable, pero n’esencia ociosa”. Llegó a acusar a los promotores de “pretender que la promoción de la llingua sía la via principal nos espectáculos”, insistió en que se malinterpretaron les sos declaraciones al respeuto y llegó a falar de “cultura de cancelación, ésa que vustedes prauticaron a lo callao, pesllando puertes a les actuaciones que nun-yos gustaben”.

La popular Ángela Pumariega rescampló “el tonu” de Quintana “y sobre manera les formes conciliadores”, adelantando’l so votu favoratible a la propuesta al “nun incluyir nengún tipu d’imposición”. “Dende’l Partido Popular creemos que la nuesa cultura, les nueses tradiciones, son un patrimoniu común de tolos xixoneses y asturianos, y debemos dende les instituciones non sólo ayudar, sinón tamién promocionar”, aseguró.

“Pola tranquilidá de toos, el gobiernu que lideramos nun va vetar nengún artista, y muncho menos a nengún artista asturianu”, arrancó’l voceru de Foro, Jesús Martínez Salvador. Amosóse, al igual que Pumariega, críticu col PSOE y Izquierda Xunida (IX), responsables de la programación festiva actual, citando l’ausencia nel ciclu de conciertos del Botánicu, “onde yera habitual que tuvieren un gran protagonismu los artistes asturianos, desapaeció; nin Toli Morilla, nin Rodrigo Cuevas, nin Luis Núñez nin Nacho Vegas van poder actuar ehí gracies a la decisión del anterior equipu de gobiernu. Tampoco nel Festival Arcu Atlánticu, onde yera habitual qu’actuaran artistes asturianos qu’amás utilizaben la llingua asturiana”, finando con una referencia d’Al Resve, “que ye’l festival que vustedes crearon pa sustituyir l’Arcu Atánticu” y, confirmó, “nun ta previsto que se celebre esti branu. Esplicarán por qué decidieron eliminalu”.

“Podemos entender la preocupación del sector, pero-yos garantizamos dende equí una vez más que nun habrá nengún tipu de vetu, qu’habrá más promoción”, polo que pide “tranquilidá. Nun será ésti un gobiernu sectariu, al estilu del que sufrimos va poco. La pluralidá, el respetu y la difusión a toa creación cultural ta garantizada, y la presencia d’artistes asturianos será mayor que los últimos cuatro años”.

José Ramón Tuero intervieno pol grupu socialista, que calificó de “barbaridaes” les coses que se sintieron de boca de VOX y que llevaron a la presentación d’esta moción. “Equí’l problema ye de l’alcaldesa y del gobiernu, porque si daquién plantega una cuestión tan bárbara igual hai que desautorizar”, pa depués apuntar que “espero que los derechos llingüísticos se respeten, que faigamos un Plan de Normalización de la Llingua nuevu porque fai falta y toca, y que garantizamos y promovamos siempre la nuesa llingua. Música n’asturianu sí y siempre”.

Zarró les intervenciones Noelia Ordieres, de Convocatoria por Xixón, qu’agradeció a la plataforma promotora de la moción “por venir a poner argumentos y voz a la esmolición” provocada “polos ediles de la ultraderecha d’esti gobiernu”. “Nada pue parar la guapura del arte y nós tenemos la obligación de defendela”, finó depués de rescamplar la trescendencia que tien la música y falar de la repercusión que tuvo en Xapón el cantar ‘Ribeseyana’ de Corquiéu o Rodrigo Cuevas “col nuesu idioma como seña d’identidá”.

Refugaes les otres dos mociones

Nel Plenu d’esta mañana tratáronse tamién otres dos propuestes, otra conxunta de los trés partíos de la oposición “en defensa de la llibertá d’espresión, de creación y d’exhibición cultural nel conceyu de Gijón/Xixón” y una de los socialistes “pa garantizar la igualdá, los derechos y les llibertaes de la ciudadanía de Gijón/Xixón”. Les dos foron torgaes polos partíos que conformen el gobiernu.