El Plenu d'agostu va tratar mociones pola música n'asturianu, la llibertá d'espresión y la igualdá

El martes va celebrase’l Plenu d’agostu, el primeru ordinariu de la llexislatura, na que va tratase la moción en defensa de la música y la cultura n’asturianu. Preséntelo conxuntamente Podemos, PSOE y Convocatoria por Xixón, que lleven tamién una propuesta “en defensa de la llibertá d’espresión”, y una tercera sobre la igualdá de los socialistes.

El testu “en defensa y promoción de la música y cultura n’asturianu en Gijón/Xixón, especialmente nos eventos festivos, educativos y culturales” tien mínimes modificaciones sobre’l propuestu inicialmente pola plataforma ‘Música n’asturianu sí’, rexistráu’l pasáu día 5 por Xicu Ariza y David Varela, representantes de los músicos que recoyeron 4.200 firmes de sofitu persones del sector y grupos, y robláu pola Sociedá Cultural Xixonesa; l’asociación Grana, N’Alcordanza de Yolanda Huergo; la Caja de Músicos; la Sociedad Cultural Gesto; y l’Atenéu Obreru de Xixón. Los dos portavoces aconceyaron el xueves colos partíos que llevaron nel so programa eleutoral cuestiones favoratibles a la llingua y la cultura asturiana, esto ye, les trés de la oposición, PSOE, Convocatoria por Xixón y Podemos, y el que lleva l’Alcaldía, Foro, y esta mañana fixéronlo col PP, en concreto cola primer teniente d’alcalde Ángela Pumariega.

Hai pequeñes modificaciones sobre la propuesta orixinal na esposición de motivos y pasa de tener cuatro a trés puntos. El primeru llama a “garantizar en Xixón el cumplimientu de la llegalidá vixente en materia de derechos llingüísticos, culturales, llaborales y de llibertá d’espresión que recueye la Constitución española, l'Estatutu d'Autonomía, la Llei de Contratación del Sector Públicu, la Llei d'Usu y Promoción del Asturianu, el Plan de Normalización Llingüística de Xixón, y les ordenances y planes vixentes nesti conceyu. Amás de respetar el conteníu presente na Declaración Universal de los Derechos Humanos, na Declaración Universal de los Derechos Llingüísticos y na Carta Europea de les Llingües Minoritaries”, añadiendo que “cumplir esta llegalidá significa que, de nenguna manera, una persona nin un colectivu, pue ser discrimináu por espresase en llingua asturiana nin poles sos opiniones”, frase qu’enantes conformaba’l puntu segundu.

El terceru pasa a ser, poro, el segundu, con un pequeñu cambiu na redaición: “Non sólo caltener, sinón aumentar en Xixón la programación d’actividaes y d’eventos en llingua asturiana, tanto los rellacionaos cola cultura tradicional como les creaciones culturales contemporánees, a traviés de les conceyalíes qu’abarquen les árees de Cultura, Educación y Festexos; amás d’en organismos venceyaos a elles como Divertia o la Fundación Municipal d’Educación, Cultura y Universidá Popular”.

Mentes, nun se toca l’últimu, que diz “promocionar y promover adecuadamente esti tipu d’actividaes dientro de la ciuda de Xixón pa que la so incidencia social seya la mayor posible. Porque cuanto más visible y conocíu socialmente seya esti patrimoniu cultural, meyor va protexese, conservase, valorase y tresmitise ente les xeneraciones venideres”.

“Mui fácilmente asumible”

Depués d’aconceyar tamién esta mañana col PP, los promotores apuntaron que “tolos partíos políticos amosaron una bona predisposición n'aprobar esta moción y comprendieron la preocupación del sector cultural poles declaraciones de la conceyala de Festexos de VOX, Sara Álvarez Rouco, de los pasaos 23 de xunu y 3 de xunetu”. Consideren que ye “mui fácilmente asumible por tolos grupos municipales que tán comprometíos col patrimoniu cultural asturianu inmaterial y material y colos derechos culturales, llingüísticos, llaborales y de llibertá d’espresión” y rescamplen lo simbólicu que ye que saliera alantre “prácticamente a comienzu del mandatu municipal y a 3 díes de que vayan entamar les fiestes de Xixón”, lo que “ye un mui bon exemplu p'amosar que Xixón ye una ciudá abierta, integradora y arguyosa de la so identidá y del so patrimoniu”.

“Valoramos mui positivamente la posible aprobación d'esta moción, porque supón un reconocimientu per parte de la ciudá de Xixón hacia les persones, empreses y agrupaciones que trabayaron, trabayen y van siguir trabayando pola riqueza de la nuestra cultura autóctona y pol dinamismu social, cultural y económicu que xenera. Amás consideramos que'l compromisu de non solo caltener, sinón aumentar en Xixón la programación d’actividaes y d’eventos en llingua asturiana, tanto los rellacionaos cola cultura tradicional como les creaciones culturales contemporánees, ye mui importante p'aumentar la incidencia social de la cultura asturiana. Porque cuanto más visible y conocíu socialmente seya esti patrimoniu cultural, meyor va protexese, conservase, valorase y tresmitise ente les xeneraciones venideres, amás d'ayudar a desarrollar una industria cultural que cree actividá y puestos de trabayu”, aseguren los promotores.

Otres dos propuestes

Los trés grupos presenten una segunda moción al Plenu del martes “en defensa de la llibertá d’espresión, de creación y d’exhibición cultural nel conceyu de Gijón/Xixón”. Amás, el PSOE presenta otra propia “pa garantizar la igualdá, los derechos y les llibertaes de la ciudadanía de Gijón/Xixón”.

Na semeya, Varela atiende a los medios el día que la plataforma 'Música n'asturianu sí' presentó la propuesa de moción, con Ariza a la so izquierda.