Xixón celebra l’Antroxu más caseru

Tamos n’Antroxu y, magar que les circunstancies que tamos viviendo nun conviden a la folixa, sí que esta celebración de raigañu tradicional nun pasa de llargu. Los postres y productos típicos d’estes feches manden nos llares y les estatues de la ciudá amazcaritáronse por nós.

‘Esto nun ye l’Antroxu de Xixón’ ye’l lema escoyíu pa esti añu. Una frase que resume bien la situación na que nos atopamos y que representa tamién perbién la sardina, siempre folixera, enclaustrada nesta ocasión en casa.

Nun va haber pregón nin concursos. Tampoco actuaciones musicales, desfile, la decoración del Paséu de Begoña…, y el Menú d’Antroxu va ser en casa y non nos restoranes, pero sí s’antroxó Pelayo, de Mafalda n’homenaxe a Quino, y les charangues decoraron les estatues de la villa, que bien se pueden disfrutar dando un paséu.

Mentes, nos llares nun van faltar les picatostes, frixuelos, ‘teresites’ y casadielles, asina como los productos d’esta época, col gochu como protagonista. Asina’l pote, la sopa de fégadu o'l picadiellu van tar estos díes nes cocines de munchos y munches xixoneses.

Na semeya, la sardina, confinada.