‘Esto nun ye l’Antroxu de Xixón’, recuerda’l cartelu d’una celebración marcada pola pandemia

Xixón va celebrar l’Antroxu, pero non de la manera na que venía faciendo estes décades tres la recuperación nel 1981 d’esti festexu de raigañu tradicional. La pandemia obliga a non contar con actividaes na cai, situación estraña que’l Conceyu reflexa nel cartelu d’esti añu baxo’l lema ‘Esto nun ye l’Antroxu de Xixón’.

Nun va haber lluces, nin pregón. Tampoco’l desfile del Llunes d’Antroxu nin l’entierru de la Sardina’l martes nin el concursu de charangues, esto ye, los actos que concentren muncha xente

Por contra, Pelayo va amazcarizase y la sardina sí va tener protagonismu, pero dende casa de manera dixital, como toles actividaes previstes pal tiempu que va del 12 al 16 de febreru, cuando cai l’Antroxu esti añu, col Xueves de Comadres el 11. “Nun ye l’Antroxu que nos prestaría entamar, pero ye’l que toca… Ha predominar la seguridá y tenemos la responsabilidá de favorecer una convivencia que garantice la salú de la ciudadanía”, apunta Lara Martínez, xerente de Divertia.

Nes selmanes próximes van anunciase más detalles sobre la programación d’esti Antroxu tan diferente, nes que nun van faltar nos llares xixoneses les costumes más venceyaes a la tradición nin los productos típicos como’l pote, el picadiellu, los frixuelos o les picatostes.