Vecinos de Xixón zárrense na Casa Conceyu pa demandar a Sánchez la robla del Plan de Víes

“Pedro Sánchez firma ya” recen los cartelos qu’amuesen a los vecinos zarraos nel salón de plenos de la Casa Conceyu dende esti llunes. Ye la manera de protestar énte los continuos aplazamientos de la robla del conveniu del Plan de Víes y esixir el compromisu del Gobiernu estatal enantes de les eleiciones del día 28.

“Esi conveniu del Plan de Víes tien que llegar porque ye’l futuru de Xixón; porque ye un plan estrátexicu pal futuru de la nuesa ciudá; porque nos xugamos muncho col Plan de Víes”, apuntaba ayeri Adrián Arias, presidente de la Federación d’Asociaciones de Vecinos/es de Xixón, tres destacar que los xixones tán “fartos” d’esta situación que-yos lleva a dar el pasu de zarrase nel salón de plenos. Un grupu de miembros del coleutivu pasó la nueche na zona acutada pal públicu qu’acude a les sesiones, cola intención de siguir hasta qu’esista un compromisu de roblar el conveniu enantes de les eleiciones del 28 d’abril.

Ediles de Xixón Sí Puede y el conceyal de Seguridá Ciudadana, Movilidá y Tresportes, Esteban Aparicio, a mou personal, acompañen a estos vecinos na Casa Conceyu. La Policía Llocal ta permitiendo la entrada y salida de les persones zarraes, que pela nueche fixeron turnos pa que siempre hubiera xente nel salón de plenos.

Concentración de sofitu

Esta tarde, a les 19 hores, ta convocada na Plaza Mayor una concentración de sofitu a les vecines y vecinos zarraos.

Semeya propiedá de la Federación d’Asociaciones de Vecinos/es de Xixón.