Vallina va sustituyir a Ferrao como conceyal d’Educación y Cultura

Manuel Ángel Vallina, siguiente na llista eleutoral del PSOE, aceptó garrar l’acta de conceyal y va encargase de les mesmes árees qu’Alberto Ferrao, esto ye, Educación y Cultura. El númberu 2 de la candidatura decidió dimitir la selmana pasada.

Nacíu n’Uviéu nel 1978 y militante socialista dende’l 2004, Vallina nunca ocupó un cargu orgánicu nel partíu. L’edil nuevu ocupa esta llexislatura un asientu nel conseyu de la Empresa Municipal de Servicios de Medio Ambiente Urbanu de Xixón (EMULSA) en representación del PSOE y tien la formación de téunicu en Prevención de Riesgos Llaborales.

La dimisión de Ferrao va producise nel Plenu próximu, que va tener llugar el miércoles, anque nun va ser hasta’l Plenu abril cuando pueda acceder al so cargu nuevu. D’esta forma l’hasta agora responsable de’Educación y Cultura abandona la conceyalía enantes de llegar al ecuador del mandatu, oficialmente por motivos personales, anque la perda de protagonismu que taba teniendo nel desendolcu de les so funciones podría ser la causa real de la so decisión.