Ferrao dimite como conceyal d’Educación y Cultura

El conceyal d’Educación y Cultura, y númberu 2 de la llista del PSOE nes municipales, dimitió del so cargu. La renuncia va facese efeutiva nel Plenu próximu, anque’l socialista yá comunicó la so decisión a l’alcaldesa y compañeros de gobiernu alegando motivos personales.

Otres fontes apunten a una perda progresiva del protagonismu nes sos funciones como responsable d’Educación y Cultura nun equipu de gobiernu con decisiones centralizaes n’Ana González Rodríguez como la razón de la so decisión. Una posibilidá que l’alcaldesa refugó dafechu.

Maestru de profesión, Ferrao rescampló nestos cuasi dos años de llexislatura como una persona sensible cola cuestión llingüística. La persona qu’ocuparía’l so acta de conceyal ye Manuel Ángel Vallina, númberu 12 de la llista.