Una segunda parte mala acaba col suañu coperu del Sporting

Los roxiblancos completaron una bona primera metá en Mestalla, pero nun aguantaron l'emburriu del Valencia pela banda izquierda, recibiendo trés goles.

El Sporting ufrió dos cares ayeri nel partíu de vuelta de los octavos de final de la Copa, al qu'acudía con una ventaya de 2-1. Depués de superar l'acosu anicial del Valencia, los de José Alberto tuvieron cómodos nel campu y algamaron el descansu con un empate ensin goles que Lod pudo romper pa sentencia la eliminatoria, pero'l finlandés, totalmente solo frente a Jaume, remató de cabeza fuera un centru llateral que paecía más fácil llevar ente los trés palos qu'errar.

El panorama camudó na segunda parte dafechu. El Sporting notó l'ausencia por lesión de Pablo Pérez, sustituyíu poco enantes de finar la primer parte por Traver, y viose superáu pol Valencia dende'l primer instante.

Noblejas nun yera quien a contener al canteranu Ferrán Torres y a Wass, énte la pasividá de Lod, y perhí llegaron tolos goles valencianistes. El primeru nel minutu 65, cuando Santi Mina remataba de cabeza un centru del danés y el balón colábase, con fortuna al pegar en Juan Rodríguez, na portería de Dani Martín.

Namái una ocasión

Un gol del Sporting daba'l pase a los de José Alberto, pero l'equipu xixonés sólo respondió con un tiru llonxanu de Djurdjevic que casi sorprende a Jaume. De siguío, Santi Mina, nesta vegada cola pierna, recoyía otru centru dende'l mesmu puntu p'anotar el segundu.

Ensin capacidá de reaición pa forciar la prórroga, el partíu siguió volcáu hacia la portería roxiblanca. El partíu finaría con un tercer tantu, nesta ocasión nuna contra definida por Ferrán Torres, que pondría'l 4-2 nel global pa los valencianos, qu'acompañen asina al Getafe nel bombu de los cuartos de la Copa.