El Valencia sal vivu d’El Molinón gracies al VAR

El Sporting-Valencia va pasar a la historia como’l primer partíu de los más de cien años de la Copa nos que s’utilizó’l VAR pa decidir una xugada. Nesti casu favoreció a los de Marcelino, superaos esti martes na ida de los octavos polos suplentes roxiblancos gracies a los tantos de Noblejas y Blackman pa poner un 2-1 nel marcador.

Nun comenzó bien el partíu pal Sporting, que vio como nel primer minutu Cofie cedía un balón al porteru qu’en realidá se convirtió nun pase a Batshuayi en boca de gol. El belga, mui criticáu ayeri por Marcelino hasta’l puntu de cambialu al descansu, nun supo qué facer col regalu y ente Dani Martín y Babin salvaron una xugada que podría poner mui pindia la eliminatoria.

El Valencia contó coles meyores ocasiones nel comienzu del choque, pero’l primeru en golpiar sería’l Sporting aprovechando la debilidá defensiva amosada ayeri polos visitantes. Sousa superaría nuna xugada pola izquierda a un pocu contundente Vezo hasta ganar llinia de fondu y poner un centru al área al que llegaría Noblejas ensin marca, con Diakhaby d’espectador, pa rematar cola so pierna mala a gol.

Yera’l minutu 34 y el comienzu de los meyores momentos de xuegu de los de José Alberto, que teníen al Valencia domináu. Sicasí, l’infortuniu quixo qu’una xugada que comenzó nun contautu del colexáu Undiano Mallenco col balón nuna salida del Sporting finara con un disparu espectacular de Parejo rebotáu pol llargueru y recoyíu por Gameiro de cabeza, siendo’l gol anuláu pol asistente por fuera de xuegu a pesar de tar en llinia’l francés.

L’árbitru contautó con José Luis González González, encargáu del VAR, y tres un par de minutos concedió’l gol pasáu’l 45. Al nun tener nidio si’l bote del balón foi dientro o fuera de la portería, nel acta dio’l tantu al delanteru.

Primer toque

La primer xugada arbitrada pol VAR nel debú tamién del Árbitru Asistente de Videu n’El Molinón –namái funciona en Primera y se punxo en vigor nesta ronda na Copa– dio pasu al descansu. El panorama nun camudó muncho na reaunudación, col Sporting sabiendo que’l Valencia, a pesar de la so calidá, yera víctima propicia.

Asina, dispuso de dalguna ocasión hasta que nel 79 Blackman adelántabase a Jaume pa rematar de cabeza un centro llateral de Traver dende la izquierda. Yera’l 2-1, resultáu col que finó’l partíu y que’l Sporting va tratar de defender na vuelta prevista pal martes a les 21.30 hores.