Un calendariu del Pueblu d’Asturies y la Oficina de Normalización amuesa’l Xixón de los años 50

El calendariu de la Oficina de Normalización Llingüística del 2020, asoleyáu en comuña col Muséu del Pueblu d’Asturies, lleva’l nome de ‘El Xixón de los 50’. Ésti repártese de baldre nes dos instituciones y amuesa semeyes feches nesta dómina del sieglu pasáu.

En total son 13 imáxenes nes que se pueden ver la Plaza Mayor, Campu Valdés, la sablera de San Llorienzo o El Muelle, ente otros llugares. Toes pertenecen a los fondos fotográficos del Pueblu d’Asturies y son obra de Pedro Alonso Rebollar, Javier Sánchez Suárez, Manuel Espín y Gonzalo Vega.

Cada mes vien cola so semeya propia y con un refrán n'asturianu. Trai tamién impresu un códigu QR que da accesu a un .pdf descargable pa cada mes nos que se pue ampliar información y ver una imaxe actual del llugar fotografiáu.

Los calendarios tán disponibles, de baldre, na receición del Centru de Cultura Antiguu Institutu y nel propiu Muséu del Pueblu d’Asturies.