“Sí queremos ser sede del Mundial; tendremos que buscar fórmules”, confirma González

Constituyóse na Casa Conceyu la comisión de trabayu pal siguimientu de la candidatura d’El Molinón a ser sede mundialista nel 2030, cola participación de tolos grupos municipales. A la salida l’alcaldesa Ana González Rodríguez confirmó l’apuesta de Xixón, anque especificó que “tendremos que buscar fórmules”.

“Necesitamos saber les posibilidaes d’un proyeutu de remodelación del estadiu, tenemos que saber cuántos cuesta y, tamién, lo voi dicir con sinceridá, quién lo va pagar”, aseguró la socialista a la salida de la xunta na sala de plenos. Orlegi Sports, propietaria del Sporting, trabaya nel proyeutu de dicha reforma, del que s’encarga l’arquiteutu Fernando Sordo.

Les obres, que taríen finaes enantes del 2030 de conceder la FIFA a España y Portugal la organización del Mundial d’esi añu, consistiríen en convertir El Molinón nun campu de cuatro estrelles UEFA, con un aforu de 40.000 asientos reales, pa lo que sería necesario una inversión cercana a los 40 millones d’euros. “El Conceyu nun pue gastase agora 40 millones, nin 10 millones”, dixo l’alcaldesa, que sicasí nun arrenuncia a la posibilidá d’acoyer la cita: “sí queremos ser sede del Mundial; tendremos que buscar fórmules”.

El Gobiernu tamién apoya la candidatura xixonesa al Mundial y la Direición Xeneral de Deportes va incorporase a la comisión. Mentes, el mexicanu Alejandro Irarragorri, presidente de la entidá y principal impulsor de la idea, va aconceyar mañana con Luis Rubiales, presidente de la Real Federación Española de Fútbol, pa presenta-y l'estáu del proyeutu d’El Molinón 2030.

Na semeya, momentos previos al entamu del aconceyamientu de l'alcaldesa y los representantes de los grupos municipales pa constituyir la comisión de trabayu.