Sergio Sánchez ye'l sustitutu de Samuel al frente del Sporting B

L'ex porteru dirixía al División d'Honor.

Nun hebo sorpresa y, como valoraba ayeri YeXixón, Sergio Sánchez foi l'escoyíu pol Sporting pa tratar evitar el descensu a la novedosa Tercera RFEF del so filial. D'esta forma'l de Carbayín Altu sigue'l so ascensu nel organigrama téunicu de Mareo tres trés temporaes al frente del xuvenil A, nesti momentu líder del grupu 1B de la categoría.

Garraba esti equipu en payares del 2018 depués de qu'Isma ocupara'l puestu de José Alberto López nel filial tres la destitución de Baraja nel primer equipu. Nestos dos años l'ex porteru fixo un bon llabor, col Celta como únicu rival superior nel grupu de División d'Honor nes dos temporaes últimes.

Gran conocedor de la plantía, al entrenar a la gran mayoría de xugadores, Sánchez tien un retu importante per delantre. El Sporting B ye l'últimu clasificáu con 6 puntos en 9 partíos, a 6 puntos del sestu clasificáu, el Numancia, qu'ocupa'l puestu últimu qu'evitar la lliga de segunda fase pola permanencia, onde valen los puntos de la fase regular.

Precisamente l'equipu sorianu va ser el rival próximu de los roxiblancos. Va ser el sábadu, a les 16 hores, en Los Pajaritos.

Na imaxe, Sánchez dirixiendo esta mañana'l so primer entrenamientu al frente del Sporting B. Semeya propiedá del Real Sporting de Gijón, SAD.