El Sporting cesa a Samuel como téunicu del filial

El segundu equipu roxiblancu zarra la clasificación del so grupu na categoría de bronce con namái 6 puntos en 9 partíos.

Samuel dexa'l cargu d'entrenador del Sporting B, al que llegó la temporada pasada tres la so espectacular campaña col CD Lealtad, ensin derrota na lliga regular, namái empañada pola falta del ascensu a Segunda División B. Nesti segundu proyeutu, con una plantía mui moza y munchos efeutivos nel primer equipu o baxando sólo a xugar, los resultaos nun acaben de llegar y, tres perder el sábadu col Burgos CF en Mareo (0-2), la decisión tomada esta tarde ye que l'ex centrocampista nun siga.

"Dende'l club queremos agradecer el trabayu, implicación y profesionalidá al frente del segundu equipu", espresó'l Sporting nun comunicáu nel que nun se da'l nome del so sustitutu. Una opción posible ye Sergio Sánchez, entrenador del xuvenil de División d'Honor, equipu que garró precisamente tres l'ascensu al filial d'Isma en payares del 2018, con una mui bona trayeutoria.

Con esti movimientu la entidá pretender provocar un cambiu na dinámica del so equipu filial cola intención de salvar la categoría. Pa ello ha de sumar la mayor cantidá de puntos posibles nesti tramu pa encarar la segunda fase de la competición, dada la dificultá esistente p'algamar el sestu puestu que permite evitar la lliga pola permanencia, anguaño en posesión del Numancia con 12 puntos, el doble que los de Mareo.

Semeya propiedá del Real Sporting de Gijón, SAD.