Rublev pasa a la historia como primer ganador del ATP 250 de Xixón, que podría tener continuidá

|
Final ATP 250 Xixón Rublev-Korda (16 d'ochobre del 2022)

La Real Federación Española de Tenis (RFET) confirma que, d'algamar la llicencia en propiedá, repetiría la organización del tornéu nel Palaciu.

Andrey Rublev convirtióse nel primer ganador del ATP 250 de Xixón, prueba que podría tener continuidá nel tiempu. El rusu, que llegó a Asturies como númberu 9 del mundu y salió como númberu 8, superó na final a la gran sorpresa de la competición, l'estauxunidense Sebastian Korda, 45 del ranking (agora 36) y fíu del históricu tenista checu Petr Korda, que con 22 años dexó pel camín hasta la final a homes del nivel del castellonense Roberto Bautista y l'escocés Andy Murray, y yá en semifinales, al francés Arthur Rinderknech, verdugu del xixonés Pablo Carreño en cuartos de final nel partíu más espectacular del tornéu con un increíble 18-16 nel tie break del tercer set.

Énte un Palaciu con más de 5.000 espectadores, con tol papel vendíu, el gran favoritu despachó la final n'hora y cuartu por 6-2 y 6-3. Nun dio opciones Rublev, que tuvo más complicaciones nun segundu set nel que Korda paeció tar más metíu nel partíu.

Trunfu arxentín en dobles

Enantes de la gran final individual disputóse na pista central la de dobles, que resultó muncho más igualada y emocionante. Enfrentaba a los arxentinos Máximo González y Andrés Molteni colos estauxunidenses Nathaniel Lammons y Jacskon Withrow, llevando'l partíu los primeros por 6-7(6), 7-6(4) y 10-5.

El futuru

Xixón podría acoyer una edición nuevu del ATP 250, cuartu tornéu que se celebra nel Estáu xunto colos de Barcelona (500), Madrid (1000) y Mallorca (250), nel 2023. Pa ello necesitaría que l'ATP concediera la llicencia a la RFET en propiedá, yá que la d'esti añu foi temporal pa esti añu pola suspensión del tornéu de Moscú pola invasión rusa a Ucraína y la cayida de la xira china poles restricciones sanitaries pola COVID-19.

Tanto xugadores como visitantes coincidieron na so gran esperiencia estos díes n'Asturies y el presidente de la RFET, Miguel Díaz Román, confirmó que de dase esa posiblidá, Xixón sería la sede del tornéu.

Na semeya, un momentu de la final individual ente Korda (moráu) y Rublev (blancu), col Palaciu hasta la bandera.

Contador Estadistiques