Pueblu d'Asturies: 50 años conservando la nuesa memoria

El sábadu, 4 d’agostu, el Muséu del Pueblu d’Asturies cumple mediu sieglu de vida.

Tres munchos esfuercios pa convencer a los responsables políticos de la época y algamar financiación, el yá fináu Luis Argüelles fixo realidá’l so suañu de dar forma al Muséu del Pueblu d’Asturies nel añu 1968. Xunto con Avelino Moro principiaron a dar conteníu a una instalación que vivió un momentu d’esplendor na década de los 70.

Un cambiu de xiru que se pretendía nel mesmu llevó a una destitución inxusta d’Argüelles nel so cargu de responsable del recintu, que quedaría abandonáu per una década hasta la so recuperación, yá nos 90, cuando Juaco López, actual direutor, tomó les riendes del muséu que nació pa conservar el patromoniu cultural de les asturianes y asturianos, estudialu y difundilu. Pa celebrar los sos cincuenta años de vida, la instalación entama una xornada especial cargada d’actividaes.

L’actu institucional va comenzar al meudía cola presencia d’Ana Monserrat López Moro, conceyala de Educación y Cultura; Félix Baragaño, presidente de la Cámara de Comercio de Gijón; y el direutor Juaco López. Darréu va proyeutase’l documental ‘De cómo nació el Muséu del Pueblu d'Asturies, 4 de agosto de 1968’, con testu de José Avelino Moro y imáxenes de Manuel Encina, y va descubrise una placa en memoria de Luis Adaro, promotor tamién de la idea de fundar la instalación museística.

‘Música pa celebrar 50 años’

Dende les 13.30, y hasta les 20.30 hores, dellos grupos van poner ‘Música pa celebrar 50 años’. Asina, van tocar En Ca'l Gaiteru (Pedro Pangua y Flavio Rodríguez), La Xordia, Lo Nueso, La Bontourné, L-R (Leticia González y Rubén Bada), Eva Tejedor y Les Pandereteres, y Caldo y Os Rabizos.