La Cruz de Ciares

Na carretera de Ciares pasa desapercibida, magar tar a la vista de vehículos y viandantes, la Cruz de Ciares, símbolu del barriu del sur de la ciudá. Namái los vecinos de la zona y persones bien informaes conocen el llugar esautu na que ta asitiada agora esti monumentu que tuvo dellos allugamientos na so vida.

Poco se conoz del orixe de la cruz. L’escritor Pachín de Melás interesóse pola so historia y nel 1932 asoleyó un artículu nel diariu ‘La Prensa’ baxo’l títulu de ‘El misteriu de la Cruz de Ceares’. Nella rellata delles lleendes, dende un accidente mortal nel llugar a un crime, anque otres persones tamién ven rellación coles 14 cruces primitives del Vía Crucis d’alredor de San Pedro.

Al nun conocer el motivu esautu pol que s’asitió ye tamién imposible fechala, anque con cuasi toa seguridá podría ser anterior del sieglu XX al ser ‘la cruz’ un nome d’usu habitual na zona nos primeros años de la centuria. El barriu perdióla per munchos años, al treslladala’l Conceyu al Muséu del Pueblu d’Asturies, pero gracies al enfotu de los vecinos recuperóse nel 2003 y reformóse a lo poco.

Agora ta colocada xunto al Llar de Ciares, otru elementu emblemáticu del barriu, y pue accedese a ella fácilmente al tar na mesma acera, al interior, arrodiada de vexetación. Xunta a ella hai una desgastada placa que diz, en castellanu, ‘Cruz d’Ánimes de Ciares. Esta cruz, asociada a la vieya capiella y cementeriu de Ciares, pudo tener una función de cruz d’animes. Estos fitos evocaben ámbitos sagraos y nellos orábase pol alma de los difuntos. Anguaño la Cruz de Ciares ye la seña d’identidá d’esti barriu y constitúi’l patrimoniu históricu del so pasáu más cercanu”.