Podemos-EQUO va facilitar los presupuestos municipales con “una astención crítica”

Tres dos prórrogues presupuestaries, el Conceyu va evitar una tercera. El PSOE va poder sacar alantre les sos primer cuentes d’esta llexislatura pola “astención crítica” de Podemos-EQUO y l’apoyu de Xixón pela Izquierda, partíu nel equipu de gobiernu municipal.

“Nun ye’l presupuestu que fadría Podemos, pero lu ameyoramos y facilitaremos que les cuentas de dereches que llastraron a la ciudá mientres los trés años últimos queden por fin atrás”, apuntó Yolanda González Huergo, vocera de la coalición tres l’asamblea celebrada ayeri nel Centru Municipal Integráu d’El Coto pol so partíu. EQUO caltién la mesma postura y valora “la flexibilidá amosada nes negociaciones” por parte del PSOE y Xixón pela Izquierda, anque llamenta qu’ésta fora a posteriori de la ellaboración y presentación de los presupuestos y non enantes.

En concreto, la coalición consiguió introducir 11 de les 14 enmiendes que presentara, destacando la continuidá del salariu social baxo una fórmula nueva. Cola postura que va adoptar Podemos-EQUO previsiblemente va haber un empate a 12 ente votos positivos y contrarios a les cuentes, que va frayar l’alcaldesa Ana González col so votu de calidá.

Na semeya, un momentu de l'asamblea d'ayeri, con González Huergo tercera pela izquierda.