Otru golpe a les infraestructures de la ciudá: el ministeriu frena’l túnel de Xove y proyeuta una vía en superficie

Sorpresa nel viaxe a Madrid del Conceyu y el Gobiernu p'aconceyar con José Antonio Santano pa falar sobre los retrasos na vía de Xove. El secretariu d’Estáu de Tresportes y Movilidá Sostenible comunicó-yos la decisión del ministeriu de frenar el proyeutu del túnel pola so complexidá y riesgos, que pretende cambiar por una alternativa en supeficie.

Depués d’años d’espera, nun va construyise’l túnel de Xove pa sacar el tráficu que va y vien d’El Musel de la avenida Príncipe de Asturias, zona de la ciudá más afeutada pola contaminación. Nel so llugar va proyeutase una carretera de cuatro carriles en superficie asemeyada al proyeutu que se prevía’l sieglu pasáu, que contaba con oposición vecinal, y que finalmente evolucionó al refugáu ayeri entrada esta centuria.

La modificación ministerial causó indignación na ciudá en tolos ámbitos, empezando pola alcaldesa Carmen Moriyón. Inclusive, convocóse una concentración de vecinos esta tarde nos accesos a El Musel como protesta.

Riesgu pa les viviendes

Los argumentos daos pa esti cambiu, que s’anuncia 10 meses depués de que saliera la obra a llicitación, son que la construcción del túnel “implica una serie de riesgos y incertidumes inasumibles sobre’l futuru de les viviendes y poles limitaciones na so operativa, al nun poder circular mercancíes peligroses y de dimensiones singulares” pel mesmu. Como alternativa, “un bulevar urbanu, con siendes segregaes pa peatones y un carril bici”.

Aína fala de “chambonada”

La formación asturianista Aína califica de “chambonada” la propuesta de Madrid. Nun comunicáu, l’agrupación llocal de Xixón critica que se “pasa d’un modelu soterráu a un plan B que dixebra Xove con una autopista de cuatro carriles, creando otru focu de contaminación atmosférica y acústica, cuando la salida natural d’El Musel ye’l túnel d’Aboñu”.

Demanda al Conceyu y al Gobiernu “una respuesta contundente” y afima qu’esta decisión “amuesa una vegada más el ningunéu que los distintos gobiernos españoles exercen sobre Asturies”. Por último, esixe que se “dea respuesta a la parálisis que sufre la ciudá en proyeutos dependientes de Gobiernu español como esti Vial de Xove, el Plan de Víes, el Solarón o’l Metrotrén”.