Orlegi abandona la idea del campu nuevu pa reenganchar a El Molinón na carrera del Mundial

De campu nuevu a reforma del actual. El Molinón caltendría'l títulu honoríficu d’estadiu decanu del fútbol profesional estatal de salir alantre’l proyeutu d’Orlegi Sports, que rebaxa la inversión total de 300 a 150 millones d’euros, pa que Xixón, agora fuera de toles quinieles, sía sede del Mundial del 2030 d'España, Portugal y Marruecos.

Y ye que’l romanticismu de xugar nun prau que lleva acoyendo partíos de fútbol dende’l 1908, ente ellos trés del Mundial del 82, ye la baza principal que tien Xixón frente a rivales con proyeutos ambiciosos, como’l de Zaragoza con La Romareda, onde hai alcuerdu coles instituciones pa invertir 120 millones d’euros nun campu nuevu nel mesmu allugamientu del actual. El sentir d’una bona parte de l’afición del Sporting y la postura del Conceyu al respeuto, amás de la dificultá pa desendolcar el proyeutu inicial, lleven a Orlegi a apostar por un plan B que pueda contar col sofitu de l’Alministración xixonesa y asturiana, clave pa convencer a la Real Federación Española de Fúbtol (RFEF).

David Guerra, presidente executivu del Sporting y home fuerte d’Orlegi nel día a día del club, aconceyó ayeri na Casa Conceyu con Jesús Martínez Salvador y Ángela Pumariega pa esplicar la idea que ta agora enriba de la mesa: una reforma d’El Molinón que reduz el costu a la metá, de 300 a 150 millones d’euros. Los detalles concretos conoceránse cuando la FIFA marque los requisitos definitivos pa los aspirantes a ser sede del Mundial, lo que s’espera p’avientu.