La concesión del Mundial del 2030 a España aumenta les posibilidaes de Xixón como sede

FIFA sorprende anunciando que la candidatura conxunta con Portugal y Marruecos va organizar una cita na qu'Uruguai, Arxentina y Paraguai tamién van acoyer un partíu caúna.

Anque nun taba previsto que se fixera la concesión hasta lo último del 2024, y la Real Federación Española de Fútbol entovía nun tenga zarraes les 10 sedes que-y corresponderíen de les 14 previstes nun primer momentu, decisión que taba prevista pa xineru, yá ye oficial qu'España va organizar el Mundial de Fútbol del 2030. Una cita que per primer vegada va tener llugar en seis estaos de trés continentes, movimientu que paez destináu tamién pa facilitar qu'Arabia Saudita acueya la edición del 2034 al corresponder asina esti turnu a Asia o Oceanía.

Lo cierto ye qu'El Molinón gana enteros pa repetir como sede mundialista 48 años depués. El centenariu campu xixonés pasó'l corte l'añu pasáu y ye una de les 14 candidatos oficiales a ser ún de los 10 escoyíos.

Les opciones pasen pol polémicu proyeutu presentáu por Orlegi Sports, propietariu del Sporting, a la RFEF y al Conceyu: un campu nuevu asitiáu nel aparcamientu actual que llevaría más de los 40.000 espectadores mínimos qu'obliga la FIFA. De salir alantre aseguraría que Xixón acoyera partíos del Mundial, pero'l grupu mexicanu entovía nun presentó'l so plan pa financiar una obra que superaría los 300 millones d'euros.

Na semeya, imaxe d'El Molinón nel derbi de la temporada pasada,