L’UC Ceares sal reforzáu del partíu col Avilés de cara a la fase d’ascensu

|
UC Ciares 0-0 Real Avilés Industrial (21 de marzu del 2021)

Finó la primer fase de la novedosa Tercera División por cuenta la pandemia de COVID-19 nel so grupu A con un históricu primer puestu del UC Ceares al sumar 44 puntos y con permanencia asegurada y clasificación pa lluchar pol play-off pal UD Gijón Industrial. L’empate del domingu en La Cruz col Avilés Industrial (0-0) refuercia a los de Pablo Busto de cara a la fase decisiva.

Con un gran ambiente nel campu, el Ciares plantó cara al segundu clasificáu, el club con más músculu financieru de la categoría, qu’apretó tres el descansu consciente de la importancia de los 3 puntos en xuegu, tanto pal so oxetivu de recortar puntos y llevar la diferencia de goles particular col rival como pa sumar de cara lluchar a con L’Entregu por ún de los dos puestos d’ascensu direutu. Porque pa esta segunda fase tolos equipos pasen cola puntuación de la primera, calculando un coeficiente de puntos per partíu al ser el grupu A de 11 equipos y el B de 10, que ye lo que se va tener como referencia pa la clasificación final.

Xunto col equipu xixonés, primer clasificáu con 44 puntos, pasen l’Avilés con 40 y el Llanera con 38, que dexó fuera al Caudal al ganar nel Hermanos Antuña 0-1 con gol de Omar. Los de Mieres, tamién con 38, tendrán la opción de dir pela vía llarga a la promoción xunto col Indus, con 27, y la SD Lenense, con 25, mentes que van lluchar por evitar el descensu el Praviano (24), el Navarro (22), el Mosconia (20), el Vallobín (17) y l’Avilés Stadium (12).

Nel grupu 2, onde entovía queda una xornada por xugar polos positivos de COVID-19 del Siero, qu’obligaron a retrasar la fecha d’entamu de la segunda fase al 4 d’abril, tienen garantizáu’l pase a la fase d’ascensu L’Entregu, con 37 puntos, y l’EI San Martín, con 32. La tercer plaza en xuegu ta ente’l Llanes, con 29, y el CD Tuilla, con 26, que necesita ganar al Colunga n’El Candín y esperar un pinchazu del club del oriente na so visita al Valdesoto.

A Segunda RFEF

El Ciares va enfrentase colos trés clasificaos de dichu grupu en 6 partíos que van poner 18 puntos en xuegu. Los dos primeros con meyor coeficiente de los seis xuben direutos a la nueva Segunda RFEF, que pasa a ser la cuarta categoría tres la división de la Segunda B en dos y va tar formada por 5 grupos de 18 equipos repartíos por proximidá xeográfica.

Los clasificaos del tercer al sestu entovía van tener opción d’ascensu al traviés d’unes eliminatories xunto colos dos meyores de la fase pol play-off, na que va tar l’Indus. De los seis namái ún va algamar el pase a Segunda RFEF.

Contador Estadistiques