L'UC Ceares arranca col Llanes la llucha por xubir

L'UD Gijón Industrial, que va competir por clasificar pal play-off, recibe al Real Titánico.

La territorial asoleyó güei los calendarios de la segunda fase de Tercera División. L'UC Ceares, campeón del grupu A, va arrancar el domingu al meudía en La Cruz col Llanes la lliga de 6 partíos colos 3 primeros clasificaos del B col oxetivu d'algamar una de les dos primeres places que dan l'ascensu a la nueva Segunda RFEF.

Los puntos de la primera fase valen pa la segunda, polo que los de Pablo Busto entamen con 44, polos 40 del Avilés Industrial y los 38 del Llanera. Los rivales, amás del Llanes, con 32, van ser L'Entregu con 40 y l'EI San Martín con 33, los trés con dos choques menos xugaos al tener un equipu menos el so grupu, polo que pa la clasificación final va tenese cuenta'l coeficiente (puntos por partíu xugáu).

Tamién al meudía

A la mesma hora qu'en La Cruz va a echar a rodar el balón en Santa Cruz. L'Indus (27 puntos) tien entovía opciones de xugar por xubir, pa lo que va necesitar recortar al CD Tuilla (27 con dos partíos menos) nos seis partíos d'esta fase.

El Caudal, con 38, yá ta prauticamente clasificáu pa les eliminatories pol ascensu, y la SD Lenense pasó con 25. Del otru grupu completen esta fase el Titánicu (23), primer rival del Indus, y l'Urraca CF (22).

Na semeya, un momentu del derbi d'esta temporada en Santa Cruz.