Los errores defensivos y la falta d’aciertu condenen al Sporting na estrena de Djukic como entrenador

Un minutu duró l’efeutu Djukic nel Sporting. Foi’l tiempu que tardó la defensa roxiblanca en cometer el primer error grave de los munchos que protagonizó en La Romareda y col que'l Zaragoza anotó'l primer de los dos tantos del partíu.

Un llanzamientu de falta llateral de Soro foi rematáu de cabeza con comodidá nel segundu palu por Guti ente la pasividá de los xugadores del Sporting. Nun empezaba bien Miroslav Djukic, impotente na banda, la so etapa como roxiblancu.

El gol nun espertó al Sporting, que salió al prau con un once nun mui diferente al últimu de José Alberto, cola novedá principal de la vuelta de Carmona a la banda derecha y un Manu García más adelantáu acompañando a Djurdjevic. Luis Suárez perdonó’l segundu tres un mal pase al porteru de Cordero, mui inocente, y Cristian Álvarez llegó’l descansu casi inéditu.

La segunda parte siguió’l mesmu guión. Damián Pérez lesionóse, teniendo qu’entrar Salvador de central, ocupando la banda Cordero, y per esa zona, nun fallu del zamoranu, llegó’l segundu del Zaragoza, obra de Luis Suárez, nel minutu 58.

Cola entrada de Hernán, y cola necesidá de nun especular más pa nun tornar de vacío, el Sporting comenzó a atacar la meta de Cristian Álvarez, que salvó al so equipu con dos paraes a disparos peligrosos d’Aitor García. L’onubense daría tamién un llargueru, al que se sumaría otru de Djurdjevic nuna xugada na que Manu García fallaba un gol a puerta vacía al querer pega-y fuerte pola impotencia.

El martes, visita del Elche

Djukic, en rueda de prensa, amosóse satisfechu pol trabayu de los sos homes. Tendrá una selmana per delantre pa preparar la xornada próxima pol parón de la Copa –de la que’l Sporting quedó elimináu en primer ronda pol Zamora, un Tercera División–, con enfrentamientu’l martes a les 19 hores n’El Molinón col Elche, partíu pal qu’espera recuperar efeutivos, anque tendrá problemes nel llateral pola lesión de Damián Pérez y la espulsión que sufrió ayeri Molinero por collorada direuta al interpretar l’árbitru Álvaro Moreno Aragón una agresión del toledanu a Igbekeme.