Djukic debuta al frente del Sporting en La Romareda

Con cuatro baxes pol gripe y con xugadores que nun tán entovía al cien por cien, Miroslav Djukic afronta esti martes el so primer duelu al frente del Sporting. El serbiu, destacáu central na Lliga española na década de los 90, sustitúi a José Alberto López tres nun cumplir l’uvieín los oxetivos marcaos pol club na primer vuelta.

Borja López, Unai Medina, Álvaro Vázquez y Pablo Pérez, que viaxaran el xueves a Zaragoza, garraron finalmente’l virus que ta siendo epidémicu nel vestuariu roxiblancu y en toda Asturies, y quedaron fuera de la convocatoria de 21 futbolistes que garraron ayeri otra vegada carretera hacia la capital aragonesa. Nella tán los xugadores del filial Espeso, Pelayo y Garci.

El choque col Zaragoza (21 hores, GOL) va ser el debut de Djukic como téunicu roxiblancu. El serbiu llegó a Xixón el 27 d’avientu y el 29 dirixó’l so primer entrenamientu en Mareo.

Col Partizan como esperiencia última nos bancos, sustitúi a José Alberto López, qu’en payares del 2018 daba’l saltu del filial al primer equipu tres la destitución de Rubén Baraja. L’uvieín nun consiguió meter al Sporting nes eliminatories pol ascensu a pesar de garrar una bona racha de resultaos la temporada pasada y la irregularidá y falta de llegada al área rival carauterizó al conxuntu xixonés nesta primer vuelta, que finó en decimoquinta posición con 25 puntos, a 11 del ascensu, a 6 del play-off y a 4 del descensu.