Les obres en Pablo Iglesias entren nel so tramu final

En cuestión de díes va finar la obra na avenida de Pablo Iglesias, que s’allarga per más d’un añu. Nestos momentos ta procediéndose a la renovación del pavimentu, col calendariu siguiente de cortes de tráficu.

Foi en marzu del 2023 cuando arrancaron los trabayos pa reformar de manera integral esta vía. Cambios na rede d’abastecimientu, ampliación de les aceres y la creación d’un carril-bus reorganizando los aparcamientos yeren les xeres principales.

Nun tardaron en llegar los retrasos y complicaciones, provocando les quexes de vecinos y comerciantes. Pero la llarga espera paez llegar al so fin, yá que’l día 17 fina’l plazu d’entrega de les obres cola que cuenta cola constructora.

Mientres, el Serviciu d’Obres Públiques arrancó ayeri colos trabayos de renovación del pavimentu incluyíu na fase 1 de les obres del carril-bus. Éstes van allargase hasta’l día 18 y conlleva dellos cortes de tráficu, polo que dende’l Conceyu afalen a usar rutes alternatives pa torgar atascos.

Pela nueche

Hasta mañana va facese’l fresáu nel tramu ente Hermanos Felgueroso y General Suárez Valdés, y el llunes ente esta cai y Usandizaga. La estensión de la capa de rodadura va facese n’horariu nocherniegu (23 a 7 hores), polo que se va cortar l’avenida ente Hermanos Felgueroso y Peñalba mañana; ente Peñalba y General Suárez Valdés, el xueves y el vienres; y ente General Suárez Valdés y Usandizaga, el llunes.

Depués namái quedaría la execución de la señalización horizontal pa cada tramu, que se fadría de manera alterna n’horariu diurno y nocherniegu. Sería yá’l tramu final d’unes obres que’l Conceyu afirmó’l mes pasáu que nun receicionaría si nun presenta defeutos importantes, como vienen denunciando los vecinos, el día 17.

Na semeya, trabayos ayeri nel entamu de la cai, al altor d'Hermanos Felgueroso.