L'aplicación d'EMTUSA torna a furrular

Llevaba más d'un mes cayida pol ataque informáticu que sufrió'l Conceyu.

Los usuarios del tresporte públicu del conceyu yá pueden consultar los tiempos de llegada de los autobuses de la Empresa Municipal de Tresportes Urbanos SA (EMTUSA) y usar toles funciones de l'aplicación. Esta mañana reactivóse esta ferramienta tan útil que nun taba activa dende'l 19 d'abril.

L'aplicación d'EMTUSA permite cargar la tarxeta, consultar el saldu o programar los percorríos en bus per Xixón. La imposibilidá de consultar, yá sía pel móvil o nes propies paraes, del tiempu d'espera de llegada del siguiente vehículu foi una de les principales molesties del ataque informáticu y xeneró munches crítiques pola tardanza n'igualo.

Na imaxe, captura de l'aplicación.