La Feria del Libro de Xixón supera tolos sos rexistros de participación

Cola presencia de 25 llibreríes y 28 editoriales, y más de 80 autores, la Feria del Libro de Xixón superar tolos rexistros de participación nesta quinta edición. Los puestos van tar asitiaos nel paséu de Begoña, onde tamién s’instalen les carpes d’alcuentros, y na cai Tomás y Valiente.

A les 11 hores inauguróse oficialmente la Feria, que se va allargar hasta’l domingu y que se complementa con actividaes nel Antiguu Institutu y na Escuela de Comerciu. Les lletres asturianes van tener presencia na cita, que cuenta con un programa estensu pa los cuatro díes.

Esta tarde, a les 21 hores, va presentase na carpa 2 de Begoña los llibros editaos por Cuatro Gotes ‘Baxo’l pumar’, de Marga Pedrayes; ‘Cartes nel horru’, d’Inaciu Galán; y ‘L’escudu d’armes de Xixón. La iconografía de Pelayu’, de Xuan Fernandi Bas, actu moderáu por Lluis Fanjul. Mañana, a les 18.15 hores na mesma carpa, Alicia Álvarez y Alicia Varela van interactuar con neñes y neños a partir del discu-llibru ‘Kikirikikí’, de La Fabriquina editáu por Araz.net, empresa editora tamién d’Asturies.com, y a les 20.45 hores Enar Areces, de Puru Remangu, va falar del llibru 'Güeli, histories d'amor y remangu' nuna cita que va conducir Patricia Martínez Fernández.

A les 19.45 hores del sábadu van dase a conocer nel salón d’actos de la Escuela de Comerciu los conteníos del númberu 18 de la revista moza ‘Formientu’ al traviés d’una llectura de nuevos autores en llingua asturiana. Mentes, a les 21 hores nel mesmu llugar, va presentase’l llibru-discu solidariu ‘Instant.es’, iniciativa de l’Asociación d’Escritores d’Asturies pa recaudar fondos pa la Fundación Banco de Alimentos de Asturias, eventu nel que va intervenir la presidente de los autores María Esther García López y del coleutivu Bernardo Sopeña, l’escritor Aurelio González Ovies y la cantautora Sandra Estrada.

Por último, Alicia Álvarez va tornar a la carpa 2 al meudía del domingu pa interpretar xunto con David Varela los cantares de ‘Kikirikikí’. De forma paralela, van entamase a los llargo de los cuatro díes talleres lliterarios y xuegos n’asturianu destinaos a neñes y neños.

Horariu d’apertura

Los puestos de la Feria del Llibru de Xixón van abrir de 11 a 14.30 y de 17 a 21.30 hores los trés primeros díes, mentes que’l domingu l’horariu va ser de 11 a 14 y de 17 a 20 hores. Ente les editoriales presentes tán Trea, Picu Urriellu, Trabe, La Cruz, KRK, Pintar-Pintar, Impronta, Hoja de Lata y Delallama, toes con obres n’asturianu.

Na semeya, los puestos de Begoña ayeri preparándose pa l'apertura.