Créase'l Premiu de Novela Curtia Andrés Solar Santurio

Va presentase na Feria del Libro de Xixón.

El Conceyu, "nel so enfotu por favorecer y promover la creación lliteraria n’asturianu y al tiempu facer alcordanza de la figura del escritor xixonés Andrés Solar Santurio y la so querencia pola llingua de nueso y la so normalización social", va crear un premiu lliterariu que lleva'l nome del de Deva. Ésti va tar enfocáu a les noveles curties, d'un mínimu de 90 páxines en DIN-A4 y un máximu de 150, y va tener una recompensa de 3.000 euros.

El Premiu de Novela Curtia Andrés Solar Santurio va presentase mañana al meudía nel salón d’actos de la Escuela de Comerciu de Xixón dientro del marcu de la Feria del Libro de Xixón. Nel actu va tar presente Manuel Ángel Vallina, conceyal d'Educación.

Hasta'l 26 de setiembre

El plazu pa presentar trabayos fina'l 26 de setiembre, Día Européu de les Llingües. El fallu del premiu va dase a conocer n'avientu, coincidiendo col cabudañu del poeta fináu n'accidente de tráficu nel 1984 con namái 29 años.