La familia Castañón tien un espaciu nes biblioteques pola XLIII Selmana de les Lletres

Los personaxes y les tires cómiques de ‘La familia Castañón’, obra d’Ígor Medio, dibuxante y músicu al que se-y dedica la XLIII Selmana de les Lletres Asturianes, ocupen estos díes un espaciu nes biblioteques de Xixón y l'Antiguu Institutu. Amás, el Muséu Barjola acueye la esposición ‘Xente llano de Xixón. La obra gráfica d’Ígor Medio’.

La Fundación Municipal de Cultura, Educación y Universidá Popular incorpórase asina al homenaxe al autor d’El Natahoyo, fináu nel 2006 nun accidente de tráficu cuando se dirixía a tocar col so grupu, Felpeyu, a Catalunya. Esti añu cumpliría 50.

Los últimos díes y hasta mañana, al traviés de la Rede Municipal de Biblioteques, lleva a los sos centros los personaxes y les tires de cómic d’esta prestosa familia que tantes risotaes nos sacó. Asina, preparáronse espacios en toos ellos y nel Antiguu Institutu nel que tamién se pueden atopar cómics o discos n’asturianu venceyaos a Medio.

Amuesa de tola obra de Medio

Amás, dientro de la programación oficial de la XLIII Selmana de les Lletres Asturianes entamada pola Conseyería de Cultura, Política Llingüística y Turismu, el Muséu Barjola espón l’amuesa ‘Xente llano de Xixón. La obra gráfica d’Ígor Medio’ comisariada por Norman Fernández y Ruma Barbero. Nella ye posible atopar delles viñetes de ‘La familia Castañón’ y otros munchos trabayos de Medio, dalgunos d’ellos inéditos, amás de pertenencies del xixonés.

Va tar abierta hasta’l 3 de xunu n’horariu de 11.30 a 13.30 y de 17 a 20 hores, de martes a sábadu, y de 12 a 14, los domingos. La entrada ye llibre.